Sylva greet Diri for house afta im win Delta govnorship election?

Sylva Sylva

One video wey Timipre Sylva, former minister of state for petroleum resources, dey shak hand wit Douye Diri, govnor of Bayelsa state, don comot for internet. 

According to di pipu wey post di video, Sylva bin dey congratule Diri sake of im victory for di Bayelsa govnorship election wey hapun on Saturday.

Diri, wey bin contest ontop di Peoples Democratic Party (PDP), chop 175,196 votes, troway Sylva of di All Progressives Congress (APC), wey gada 110,108 votes.

Di video wey don dey circulate for social media, especially X, don gada thousands of views and engagements.


“Chief Timipre Sylva, di candidate of APC don visit Govnor Douye Diri of PDP to congratulate am. Abeg, no die for dia fight. Imagine di pipu wey don die ontop notin. E too pain,” na so one X user wey share di video write.

For di video wey don dey everywhere, Sylva dey shak Diri hand wella, come dey tok wit am but di audio no clear. 

Anoda X user write sey: “Chief Timipre Sylva, di candidate of APC don visit Govnor Douye Diri of PDP to congratulate am. Di pipu wey kpai ontop #BayelsaDecides2023 mata die for notin. Di good tin be sey Govnor Diri go concentrate on di development of di state.”



Even though permanent enemies no dey for politics, Sylva and Diri no dey jam as e be so, sake of how di Bayelsa govnorship election comot.

On election day, Diri bin tok sey Sylva dey chook hank for wetin go increase violence during di electoral process.

“Timipre Sylva dey cari violence come for every election. If you rememba, di leader of di Ijaw nation, elder Edwin Clark, bin write letter to ask am why e no wan gree drop di violent way im dey take win election,” na so Diri bin tok afta im cast im vote.


“Anyhow e be, God dey throne and we no go gree for am for di violent way im dey take win election.”

On im part, Sylva claim sey di PDP bin cause violence during di election. Di former minister bin also tok sey security agencies bin dey “play on di side of di PDP”.


“PDP dey bring plenty violence to attack our voters wit security (agents). In fact, in some cases, our pipu believe sey our election no be against PDP, but na against security (agents) but we dey chuk head small small,” na so Sylva tok.



TheCable cari reverse image search check some of di screenshots from di video, and e cari us go one TikTok account wey get GbaramatuVoiceTV as im username.

GbaramatuVoiceTV bin post di video in May 2023, six months before di govnorship election in Bayelsa.


Di video bin get one caption wey dem write: “HE Timipre Sylva attend HE Douye Diri fada burial for Sampou.”

Diri fada, di late Pa Abraham, retired headmaster, bin die on February 12, 2023, at di age of 88. Dem bury am on May 6.

Di GbaramatuVoiceTV TikTok account also get some oda posts of different events, including weddings and anniversaries.


Di video don tey and no be visit wey Sylva go meet Diri to congratulate am sake of im election win.  

Dem shoot di video, come post am in May 2023 wen Sylva visit Diri to show am support as im papa die. 

Even as Diri don hail INEC for di election wey dem do, di APC for di state no gree for im victory and dem tok sey make INEC cari eye look di results again within one week.

Add a comment

Leave a Reply

Your email address will not be published. Required fields are marked *

error: Content is protected from copying.